حاسس بإنّي باعرفكم كُلّكُم
من غير حِساب و لا استِغراب
وشوش ... أجسام ... شعور
والاْرصِفَة المرسومَة لخطْواتكم و خطْواتي
كفايَة تكون سبب لإنّي باعرفكم
ماعنديش أسئلة ليكم، و لا استفسار
غير التحيّة و الابتسامة في اللحظة ماليش طلَبات
بلا استعارات، الحب صندوق للأماني ما بيننا
و اللعبة بلا استعراض فاتحة دراعاتها لكل أسباب الحقيقة
مافيش توقيت و لا ساعِة لُقا متحدّدة
و مش مهم الاستعداد
و الانتظار ماهوش واجِب
و لا بالسعي نتقابل
و مش لازم لو فيه بداية حتكمّل
و مش لازم تبقى النِهاية مفهومة
سلامي للجميع واجب
و لو طالِب، أنا أعطِي و لو قادِر
و لو سائِل ، أنا مجاوِب و لو عارِف
و لو فاهِم، أنا ما اسألْش إلا لو تقول إنتَ
لا نتفاوِض
لا نتعذّب عشان نِفهم
و إيه الأصل في الأشياء؟
و إيه الأصل في الخِلقَة؟
و إيه الأصل في النظرة ، في الابتسامة ما بين اتنين؟
و إيه الأصل في الدوشَة حوالينا؟
و إيه الأصل في السُكْنى ساعات؟
و إيه الأصل في البُعد اللي اتفرَض أوقات؟
و إيه الأصل في الإحساس اللي فجأة بييجي يغيّر اللحظة يودّي الذهن و يجيبه؟
و إيه الأصل في الفكرة؟
و إيه الأصل في النِيّة؟
و إيه الأصل في الوقت، كان امبارح أو كان بُكرة؟
و إيه الأصل في النسيان؟
و إيه الأصل في الذكرى؟
و إيه الأصل في النظرة ما بين اتنين؟
و إيه الأصل في اللحظة اللي جَمَعِتنا و جات من فين؟
و إيه الأصل في النظرة ما بين اتنين؟
و إيه الأصل في الدوشة حوالينا؟
و إيه الأصل في الكِلمة اللي باكتبها؟
و إيه المعنى لو تِوصَل و إيه المعنى لو تُنْسى؟
و إيه الأصل في الكلمة اللي باسمَعْها و اردّدها فتِبقى ليّ بانسِبّها؟
و إيه الأصل امّا ننام نِحلم و نِصحى نلاقي نفسِنا ناسيين؟
و إيه الأصل في النظرة ما بين اتنين؟
و إيه الأصل في السور اللي حوالين المدينة وجاي يفصل ما بين مكانين؟
و إيه المعنى ف الانتظار؟
في الاستمرار؟
و في البحث اللي ما يوصّلش؟
في التوهة؟
و إيه الأصل في اللحظة اللي حسّينا فيها اننا شاركنا الحب؟
و إيه الأصل في النظرة ما بين اتنين؟
و إيه الأصل في الشروق و في المغرِب؟
و إيه الأصل في القلق؟ و الخوف م الموت؟
و إيه الأصل في الخطوة اللي من غير صوت؟
و إيه المعنى في تشبيكة الإيدين؟
و إيه الأصل في النظرة ما بين اتنين؟
مسار الحب ع الأرض الطريق، مشبوك في حبل مِتكهرَب
مِعلّق في السما فوقنا
و شايفينُه تمام، و الوَصْلة مكشوفة كمان أمام عيننا
و شُفْت الحُب عدّى قُدّامي الطريق
و ماستنهاش إشارة نُور تضوّيلُه
عشان يسبَق يعدّي لْضفّة مختارها
بلا تفكير و لا استنّى
و إيه الأصل في الانتظار؟
و إيه الأصل في النظرة ما بين اتنين؟
و إيه الأصل في السؤال و الردّ؟
و إيه الأصل في الضحكة اللي من غير قَصْد؟
و إيه الأصل في الجُملة القُصيّرة اللي ماتصرّحش
و في اللحظة الحُروف تتعدّ؟
و إيه معنى القصيدة لِنا إذا ماكانِتش فيها النَّبض؟
و إيه الأصل في النظرة ما بين اتنين؟
و إيه الأصل إيه المعنى؟
و إيه الأصل إيه المعنى؟
سلام يسري
جينيف ١٩ فبراير ٢٠١٥
