30‏/04‏/2014

كلمة بكلمة


المثالية ما بتغيّرش اللي برّة - بس اللي جُوّة يغوص أكتر

من قبل ما الكتابة تقول اللي انا عايز أقولُه
كان نبضي ضعفان
و حواجبي ضامّة
جفوني تورّي بالعافية اللي كان في الليل بطولُه
و الدمّ نقصان
و القوضة ضلمة
اخترت اكتب كلام و مش عارف ميعاد وصولُه
بلا عنوان
أفكاري عتمة
ماكانش فيه ورق فاضي، بس السعيد حظّه ينولُه
سطور ألوان
و الورق زحمة
و بين سطوري القديمة، قلمي لقى سطور يسمعولُه
و كان قلقان
كلمة بكلمة

سلام يسري
باكو ٢٩-٤-٢٠١٤

18‏/04‏/2014

لو كان باقي في الحيل









لو كان باقي في الحيل اللي يشد حيلنا سوا
ماكانش الحال بقى ان صورنا لبعض ينقلها الهوا
و لوحدُه يختار يطيّر أنهي حتّة م التفاصيل
ساعات شعرِك و فستانِك لو عندُه ديل
زيّ في الأفلام تكون طايرة من غير جناح يرقُص
و ساعات غايمة و وشَّك ياخُد منه الهوا ينْقَص
لو كان باقي في الحيل اللي يشد حيلنا سوا
كانت صورة لنا جنب بعضنا اترسمت
لون يزيد على لون، نشوف تفاصيلنا و اكتملت

سلام يسري
١٤-٤-٢٠١٤

من قبل ما يخبط الألم



من قبل ما يخبط الألم على الورقة
و يزيد الحرف التاني ع الأوّل
و يكمّلهم ثُلاثي
بعدين يتحوّل السطر لرموز
خبْطَة مَحْنِيّة، منَقّطة
خبطة من العالي ع الواطي
و َمسنودة على سَطر مفرود للحكاية
و حبر أزرق و لا غامق و لا فاتح
ملا الخمس سطور الأولى
و مكمّل
--
من قبل ما يخبط الألم على قلبي
و تزيد نبضة على نبضة
و تلحقْهم، تسرّعهم
و يجروا يكمّلوا دقيقة
و معدودة
و محدودة
إيقاعهم يملا جوف صوتي
و يفتح عيني ع الآخر
يقرّب وشّي م اللقطة
تغوص جُوّة العيون البنّي
و تكمّل
--
من قبل ما يخبط الألم على باب بيتي من برّة
و خبطة وراها خبطة تانية، و التالتة
أروح أفتَح
يفوت جُوّة الألم
يختار مكان يريّح فيه
و يبتسم ابتسامة مش كاملة
و اقدّمله
أضايفه و اريّحه خالص
أقعد قُدّامه، لغاية ليلنا ما يحضَر
فيتّاخِر
ياخُدْني جَنّبُه
ننام نحلم لحدّ الصُبح
و لمّا حنصحى حنكمّل
--
من قبل ما يخبط الألم على حنجرتي، فأغنّي
يعدّي نَفَس خارج من جوفي على برّة
و عارف إنّه خارج مكان ما خدْتُه في جوفي من حَبّة
و اهو مكمّل
و صوتي يعلّي
يفضحني
و انا سايبُه
و دي غنوة عن الخبطة
و عن إنّي مع الخبْطات 
أنا مكمّل

سلام يسري
باكو ١٧-٤-٢٠١٤

13‏/04‏/2014

في عز الصمت



هنا في عالم الأحلام
الناس لسّة كتير
صورهم على اختلاف الحجم و التركيز
على العينين
أو الأجسام أو النظرة أو البسمة
في عز الصمت ناطقين بالحنين
من إمتى و انتم موجودين؟
مش فاكر غير انّي عارفكم
و باسألكم 
في عز الصمت
هنا في عالم الأحلام
البكا يصدق
حاضن نفسي
و متبّت في غمْضِة عيني
هنا في عالم الأحلام
نُقَط بهجة من قلب الخيال
في عزّ الصمت

سلام يسري
١٣ إبريل ٢٠١٤
باكو

يا قلبي لا تحزن





من لحظات الصخب
للحظات الهدوء الوحيد
يا قلبي لا تحزن
لا تجري ورا الدوشة المخنوقة
و لا تقلق من الوحدة
يا قلبي لا تقلق
أكم من مرة طلّت عيون و بعدين غابت
يا قلبي لا تنتظر
سابقني دايماً و مش صابر
و هو دا الي جايبلي الشقا
لكن كمان سبب السعادة في اللحظات
فيا قلبي لا تصبر
إملا الصخب المحاوط نبضك
بس خليك حنين على نفسك
مااقدرش اطالبك
لكن حاقول لك
يا قلبي لا تتعذب
كل الألم بيفيد
و يزيد النبض عمق الخبطة
بصوت مليان و مالي
و مش ساكن
يا قلبي لا تسكت
كمّل معايا للآخر
و انا مكمّل
يا قلبي لا تزهق
فاتت لحظة
و كنت انت في لحظة تانية
و أنهي لحظة في الاتنين كانت أحنّ
و أنهي لحظة في الاتنين كانت أبقى
يا قلبي لاتبكي على اللي فات
يا قلبي لا تجري على اللي جاي
يا قلبي لا تسمع كلامي

سلام يسري
١٣ إبريل ٢٠١٤