ضِل اللُقا

https://soundcloud.com/altamye/13eq9n6ghcau 

صحيت م النِجْمة

نوّر نهاري 

وحماسي فتّح عينيّ

قَلَعْت ساعتي 

عندي ميعاد برّة

برّة الزمن

برّة القلق

برّة الزَهَق

برّة الزحام

برّة الأحكام

برّة الصورة اللي فارغة م الحكايات

وجوّة الحكاية 

بأصلَها

جوّة العينين صافية

رغم الألم دافية

باصص لها

نِزِلْت من بيتي 

ولا حسَبْتِش المسافات

القيمة صوت هادي

سَمَع رايق

وبوح مصدّق المُمْكِن

وفاتح نَفَسُه لمفاجآت

لقيت

كلّ اما افتَح لقيت

ولا خبّيت

سألت

ما قلقتِش

من غير فضول

لكن بشغف 

متجرد من كل تفاصيل الرواية 

اللي محفوظة ومتذاكرة

مثاليّة غرقانة في حنيّة 

وماكانش سحر

نظرة أصيلة تحضن نظرة

تطَبْطَب

يمكن تطبّب

تشدّ الهِمّة

تزيح غُمّة

ولو لحظة

نعيش لحظة ولو هي اللي موجودة

ما باستنّاش ولا أكتر والا اللي أقلّ

ولا باطمَع ولا باطالب

رجِعت البيت

لبست ساعتي

لقيت الوقت اللي فات 

كان نص يوم بتمام

وروحي كإنها عاشِت سنة حتنام

حتنام وهي دفيانة

ما غسلتش وشّي

خلّيت بشرتُه متظلّلة بلُقا

غمّضت عيني، ونمت، حلِمْت

صحيت تاني يوم 

لابس ساعتي

ولكن وشّي لسة متظلل لُقا

سلام يسري 

٢٤ يناير ٢٠٢١