https://soundcloud.com/salamyousry/kv6qs81xjke5
كلمات وأداء وموسيقى سلام يسري
٢٠١٦
وانا اللي لقيت شغلتي في الحياة
وكشفت سر النبض ليه مش منتظم
وعرفت ان الوظيفة الأم
إني أضايف القلوب لما تحب تلاقي بيت عندي
وتمشي لما تحب
أضايف قلوب تانية
واسافر...
تضايفني قلوب
وانا اللي لقيت شغلتي في الحياة
باضايف الأشواق بتاعة ناس زايرين
زوار لشوق جوايا
شوق قلقان
على الوش رايق
وجوة موج طايش
ونفسه الطيش يسود
وانا اللي لقيت شغلتي في الحياة الترحال
ما بين بيتي هنا وبيتي هناك
وبين عبور وعبور
عِبَر بتملا العين
وتملا الراس
وتملا النبض
وباغرق في كل مرة باسافر
وباطلع من غرقتي
بإني أسيب إيدي
رضا وقبول
وباستسلم
بقوة الاختيار
وقوة لحظة مابتتعادش
ونفسي اللي دخل..خرج..ولا بيرجعش
وغلطة عملتها وباطلب منها ما تعاودش
ولمحة مالحقتش آخد لها صورة..ماتتعوّضش
وصمت..كان واجب في لحظة..مليته كلام
فخبّيت سحر بقى مابيسحرش
وطلب سألت وجالي الردّ لأ..
فنسيت ولا ألحّتش
ولغة ألّفتها في الحلم بحروف وصوت
ونسيتها..ما اتسجّلتش
وسطور كتير قريتها..ذاكرتها..اتعلّمتها
فدابت جوّة أفكار غامضة ما تفسّرش
وأسئلة كنت اسألها زمان ونفسي الاقي لها إجابة
ونسيتهم ونسيت اني كان نفسي اجاوبهم
وشكل عينيّ وانا أصغر اتبقّى منه كام صورة
لكنه خلاص نحته اترسم بالشيب
وخطي اللي من كُتْر ما شغلني رسمه نسيت أصله
وصوتي اللي من الدخان بقى صوت غميق مجروح
بينبَح حكمة ما تعلّمش
وباستسلم
بقوة جهلي وسذاجتي
وبراءة طفل معايا وانا مولود مااتولدتش
وباستسلم بقوة الألحان على إنها تبكّي
على إنها ترقّص
وباستسلم بإن أول قصة الحب
أصبح إدمان
وخلّى خيالي ما يكبرش
أبعد من الأوائل ولا يغطسش
غير وهو لامس أرض
يخاف م البحر
يخاف م السرعة
يخاف لو ما يسلّمش
لكني خلاص باعلن سلامي باستسلامي
ولزام عليّ
عشان السطور دي ماتكونش بس كتابة شعرية
لزام أمسك في معانيها
ولو فترة
عشان بس اعرف أقول
إني لقيت شغلتي
لقيت شغلتي في الحياة
جينيف ٢٠١٦
ليست هناك تعليقات:
إرسال تعليق