قلت: اكتبي عنّنا
وكان قصدي تكتب عني
واني أنا اكتب عنّها
لو اكتب عنها
ولا ابقى ولا هي تكون
حيبقى الحضن، الوقت النظرة
كل اللي بيننا
شوق واصل وموصول في السنين
"قذ الخير اللي ما بيننا سوا"
وعشان جوايا شجن
أول حاجة بتصحى الحزن
وعارف انها ماشي
وكل اللي بيننا مش حيلاقي يتروي، فيعطش
ونروح ندوّر تاني على شوق
ونلاقيه
بيني وبينك
جديد دايم
ونور يبني
وبنت صغيرة بتكبر
وبتكمّل سيرتك وسيرتي
بيني وبينك
الخوف
قاعد
لكن يجيله وقت ويمشي
وأملي انه اما يروح
نكون انا وانتي لسة هنا
قاعدين
نعرف من غير الخوف،
ازاي عنينا تشوف
من غير الخوف، على إيه نقدَر
من غير الخوف، الدوشة فين
من غير الخوف، إيه بيقلقنا
من غير الخوف،
أغرق جواكي
حتى ولو ما ارجعش
وتغرق معايا
طلبتي مني اني احمي نفسي
وانا وعدتك
وعشان خايف من الوجع
عشان دُقتُه بدال المرة مية مرة
فوعدت نفسي أحميها
لكني نسيت
وفضلت بيكي أرويها
تكون ليلة
لما ترجعي تضلِّك
تفضل شفافة وأصيلة
كما مرايتِك
السحْر
فكرتيني بإني عايش بيه
ومن غيره
أموت م الملل
أموت م الهمّ
يقتلني ان الحياة من غير السحر تعاش عادي
ساعات ورا بعض
مفيش عفاريت
مفيش عيون تبرّق مجذوبة
مفيش نفس بيخرج نار ساعات
وساعات بيخرُج برد
نفس ريحتُه تملا المدينة
بالسحر
أهو وشك وانا باصص لك
اتغيّر ييجي عشرين مرة
عينيّ قادرة تِغْنيكي
وعارفاكي
كل الوشوش
وقابلاكي
ومش حاطّك صورة ثابتة وملزوقة على حيطة
لكن شايلك حركة وأمان
عينيّ
مدينة
لو تمشي فيها للفجْر
لا تخافي ولا تقلقي
حتلاقي حد يعزمك على شاي
وهو مش عايز غير انك تبقي مبسوطة
عشان يمكن بتفكريه ببنتُه
أو بمراتُه وهي شابّة وسعيدة
حتلاقي شجر يملا الطريق يمين وشمال
حتلاقي بحر
فاتح دراعاتُه معلّي الموج عشان خاطرك
وقمر طالع في عز الضهر بيقوللك أنا بتاعك
بنوّر ليكي انتي لوحدك
حتلاقي ونس ومن غير قيد
حتلاقي صُحبة بتودّك
حتلاقي حظ
حتلاقي سحر بيحبّك.
١٧ مارس ٢٠٢٤
الفكرة اللي بتيجي تتملّك
تغيّبني
مش فكرة شريرة
لكنها حاضرة لنفسَها
وتتغذّى على نفَسي
وانا سلّمت
أنا اللي وافقتها وسيبتها
بإني اديتلها مساحة
لو بس اشوفها، أسمعها أو المسها
واسيبها تعدّي في طريقها
كما العابر وجاي يشرب قبل امّا يكمّل رحلتُه
مش جاي يقعد لكن رحال بيستكشف
والفكرة مني أو من برة
ما تفرقشي
أنا موجود في الأصل
ومني الفكرة
وليّ الفكرة
واقبلها
لكن مش لازم أرغي معاها
هاسقيها شاي
ولما تشربُه تمشي
وانا حكمل أعمل أكل
واتغدّى
واكمل يومي بالأفكار
وبالحركة
كلامَك
ماكانش ليّ
كان لفكرة انا اجذبها
صورة وف بالَك
نفسها تِحصَل
تكون
خيالك لاقاني
صورة
ولكن مش الأمل
وكان الوقت متقسّم
ما بيني وبين أفكار جُوّاك
والحِمْل أكبر م القصة
فضِلْت اصغَر
وتاخُد مني إنتَ ...
فتكْبَر
بقيت ضعيف وانا مبدّيك
وكنت ادّيك
كل اللي ليّ
سلّمتك الأيام
بالساعة والفكرة
وبعد ما خِلصت الحكايات
عذابي سليم
ناقص سلام
لكنه الحقّ
علمني
رجعت اكبَر
رجعلي بصَر
رجعلي الصوت
ولسة انتَ ضئيل خايِف
عايز أمان
لكن مفيش جواك حنان تدّيه
تايه تدوّر يمكن حدّ يملا مكان
والدايرة بيك تلف تعيد
وانا اتجدّد
وانا باكبَر
وانتَ محلّك
وانا فاكرَك
أكيد فاكرك
لكن وجودك اللي ولا فكّر فيّ
ولا رعاني
بقى بس غيمة وحتعدّي
١
ربيع الفكرة
أوّل ما الفكرة بتصحصَح في الذهن
بتبرُق حيّة وعفيّة
وشابّة قادرة تروح عشان تِوْصَل
وييجي معاها حُريّة
أمل تغيير وجاي يِحْصَل
٢
وصيف الفكرة
تِكون تِقْلِت بعد امّا يِهضِمْها كيان العقل
وتاخُد جنبها أفكار ويندِمجوا
وتِعجِنهم نسيج حاضِر
فتتعذّب
وييجي معاها حَرّ شديد
والمُخ يلِف في دواير
ع النوم والراحة مش قادر
بيتقلّب
٣
خريف الفكرة
لما الفكرة تتألّم بعد امّا خدِت مكان كامل
وصفصفِت
وبقالها روح جُوّة نسيج روح الأفكار اللي سبقِتْها
بقِت جُوّة تمام زيّ الخليّة مش مِتشافة لِوَحِدْها
لكن باقية بشكل جديد
جُوّة العروق
وييجي معاها بعض الحُزن
وشيء م الشوق
٤
شتا الفكرة
أمّا نحاول نِفتكرها لكن بحنين
كانت فكرة وكات حيّة
دلوقتي خلاص بقى منها سلام الفكرة وسكينة
ونسيان الافتقاد لشخص ان كان ولمدينة
شِتا يحضِر
وييجي معاه صور تجريد ألوان حُرّة
وييجي معاه فكرة جديدة عن بكرة
سلام يسري
٧ نوفمبر ٢٠٢٣
فاكرة
امّا كانت المظاهرة في الشارع وانتي في بيتي
وجايبة أكل وشرب وناوية نسهر
وانا وافقتك
وماعرفناش نركز نظرة بيننا
الحب تاه في هتاف طايش
فاكرة
لما كان الشغل ناقص
وماكنتش عارف حادفع الإيجار منين
جيتي تقوليلي حتتعدل ومعلشي ماتقلقشي
وانا سمعتك
لكن غابت نظرة مابيننا في مستقبل مافيهوش أمل
والحب ضاع في حاجة اليوم وأسئلتك
فاكرة
لما كان بيننا سفر ومدينتي بعيدة عن حضنك
واستنيتك واستنيتيني؛ لكنّ الوقت ما استناش
و بعِدْت خالص كل امّا كان يمر يوم ورا التاني وخسرتك
وقابلتي صدفة قريبة خدت مني حضوري فغبت
أكيد انا لسة بافتكرك وبافتكر الذكرى ساعات
واني خسرت الحب في المسافات
فاكرة
لما الحرب قامت
واحنا بنشوف ألم صاحي
ونتنهد ونبكي نخاف على اللي جاي
نسينا كل اللي جاي بيننا
وضاع الحب في خندق خايف مستخبي
لتيجي الحرب تقتله
فمات برضو بفعل الخوف
و ضِعت وراه بفعل الفقد
و ضعتي انتي في أشواقي
فبقيت ادوّر في الوشوش على وشّك
وبقيت احلم ألاقيكي تدقي الباب تفاجئيني وتبتسمي وتيجي لحضني تتخبي وتحميني
من الحزن اللي ماليني على بكاكي
فاكرة
اما كنت باناديكي فالاقيكي في نفس اللحظة بتنادي
ولاقيتك قدام بيتي و طالعالي وانا نازللك
بلا اتفاق كان الوفاق
وفاكرة
لما قلتيلي ان انا وحشتك وقربتي وكبر حضنك
وخدتيني على القوضة وعينينا كانت مغمضة لكن شايفين
بأشواق لهفة البعد اللي كان أسبوع
سبوع واحد وعيد ميلاد ودورة في كل شهر تزورنا نتلخبط
ونتعشم الشهر الجاي مانتلخبطش
فاكرة
اما وصلتيني المحطة وانا مسافر
وقلتي انك حتستقبليني لما ارجع
ورحت وجيت وقفت استنى صوتك
لا جالي الندا و لا جيتي
وعرفت ان الظروف مانعة
والشغل والعيلة والأصحاب مشاغلينك
ومش سايبين جواكي مساحة تلاقيني
وتديني مساحة أقعد ولا اتربع
شربت سيجارة وانا واقف وطفّيتها
وصل مسافرين بالآلاف
وخلصت علبة السجاير كاملة
ونمت مكاني م الوجع اللي بقى في الدم
فاكرة
امّا دخلتك في قلب كل فكرة جاية تزورني
فاكرة
اما كنت اكتب سطر وبعده السطر
واملا بين السطور سطور ليكي
فدخلتي في دم حكاياتي
وكل الصور وريحة بيتي
فاكرة
قلتيلي مرة حاجيب شمعة واقعد جنبك ونتونّس
ولا جيتي
قلتيلي مرة مشغولة مش قادرة أدَخَّلَك يومي
بعدين لقيت الباب خبّط وطليتي
ومرة زعقتي بس عشان سألت عليكي
ومرة فضلتي ترغي لساعة الفجر من غير فصلة
لحد ما زهّقك صوتك
ومرة عملنا أغنية وكات بتقول كلمة وحيدة
وكنا مبسوطين بيها
وغلطنا فتحنا نتفرج على فيلم واحنا سوا
قلب القعدة قعدة نكد وفكرنا بعيوب الكون
ظروف طارئة
لحظة وراها فيه لحظة
بظرف جديد
وخنقة كتير
وبلخبطة
والأسهل اقول خلاص بلاش
دا شيء يتعب
كفاية عليّ لخبطتي وانا لوحدي
كفاية أدادي مشكلتي
واقوم غايب
لكني لسة مكمّل غُنا
لسة البيبان مفتوحين واحنا سوا
يدخل هوا
ولو دخل ويّاه تراب نفضل سوا
فعلى الأقل نكون سوا
فاكرة
وانا في الكشف عند دكتور الحكاية
قاللي ان المظاهرة حتعدّي قدامي كل سنة فحتلخبط
وان الأخبار حتنقللي صور للحرب طول اليوم
وان العالم مكان مزعج ومش حيخفّ
والناس مليانين بالكركبة ومش ترتيب
وان اللحظة سريعة زيادة مابتهداش
وظرف وظرف
وراهم ظرف
وظرف جديد
لكني باخد نفس كامل
مليت صدري
مليت قلبي
ومستَبْيَع ومش بايِع
ومتساهِل لكني أكيد ما باستسهلش
ومتسامح وآه مسامح
وجاهل أكتر كل يوم عن يوم قبله
وتايه توهة اللي فجأة نسي العنوان
حتفتكري؟
يضيع الحب لما نضيع
يخاف الحب لما نخاف
وانا وانتي مالينا الحب
لكن كل اللي حوالينا بيخرقنا
يشرّخ بيت حكاياتنا لبعضينا
ونفسي أخبّي دوشة الشارع اللي داخلة الصالة
ونفسي أطفّي صوت جاري اللي بيزعّق
ونفسي أداري همّ المدينة عن عينِك
وغيمها ماشي فوق راسنا ولا يفارق
ونفسي أبطل اتسابق أو اتخانق
نفسي النفس يروح خالص
كفاية اليوم اتعاد بترتيب والسنين كاملين
وعدّوا كمان الأربعين
يمكن مش لازم استحمل سنين جايين
ولا أيام تسابقني
ما تسبقني
ودي اللعبة
نحاول نسبق اللحظة
لكن اللحظة على ما المحها تكون فاتت
خلاص ماتت
وجات لحظة سكنت مكانها
وانا مش مزنوق في لحظة مش عايشة
أنا فاكر
حتفتكري؟
سلام يسري
١ نوفمبر ٢٠٢٣
