الحب صوت بيروح
يرجع صدى بيبوح
الحب يموت م الخوف
لو مش بيتجَدّد
دِلْوَقْت انا محتار
والحيرَة بِنْت الخوف
كلام بيدور جُوّايا
متلخبطَة الحروف
قلبي دقّاتُه تِزْعَق
إيقاعها مش مألوف
نَفَسي الخايف لَيُخْرُج
فمايدخلش ويتبدّد
الحب صوت بيروح
يرجع صدى بيبوح
الحب يموت م الخوف
لو مش بيتجَدّد
النوم ما جاش وفارِق
و تلات ليالي كاملة
عقلي قلقان وكإنّه
محتاس عامِل عَمْلَة
جِسمي اتجَبِّس والنور
بقى شايفُه في الضَلْمَة
غابت الشمس قاصْدَة
وقمَرْها نوره اتجَمِّد
الحب صوت بيروح
يرجع صدى بيبوح
الحب يموت م الخوف
لو مش بيتجَدّد
حبعَت لشمسي نِدا
أوّل جواب سافِر
جايِز تِحْرَق سطورُه
الشوق حيتصادِر
يمكِن تقراه وتنسى
أقبلْ ولا أعافِر
أو تِكتِب بين كلامي
يرجع صدَاه يتردّد
الحب صوت بيروح
يرجع صدى بيبوح
الحب يموت م الخوف
لو مش بيتجَدّد
سلام يسري
١٣ يولية ٢٠٢٣
برلين
ليست هناك تعليقات:
إرسال تعليق