ليكي انتي الوقت وليّ الصبر
جوايا كلام مالوش يخرج
ولو يتخانق هخنقه
ولو يتضايق اطبطب عليه
ولو قلقان أنا باقلق
ومش مستني منك ردّ
الحيرة مذهب للحياة
النية ليّ مابتِكفيش
الرغبة تطلُب مني فعل
والحزن لما يلاغي الحدس
يعيش الحزن يتنفس
أما الألم اهو في الدم
وحتى الميّة مابترويش
ليكي انتي الوقت ولي الصبر
مافيش في إيديّ شيء.
يمكن طلب واحد …
عليّ ما اطلبهوش
مزنوق في قلب الشوق
لا انا هنا هنا ولا قادر أروح
ولو انتي كنتي بنتي مفيش عليكي ذنب
ولو انتي تبقي أمي فبرضو مالكيش ذنب
ولو إنتي ليّ حبيبتي فمشاعري مش ذنبك
ليكي انتي الوقت ولي الصبر
الحزن مكتوب ع الجبين
ومرسوم وشم ع الإحساس
يا كلّ الناس،
لا تسمعوا وانسوا اللي قلته
ويا اصحابي؛
عرفتوني وهتنسوني
وزي ما بتحسّوا الحزن؛
الحزن بيتنسي في الوقت
الوقت بيحب انه ينسى
وانا في الوقت،
أنا في الوقت
مزنوق في ساعة ودقاتها
ومزنوق في جسمي
الحكمة بنت الوقت
الحكمة تتقال لحظة
الحكمة تعيش سنين
ليكي انتي الوقت و ليّ الصبر
مشواري ومشوارك
جمّعهم المكان
وفرَقْهم القلق
وذكريات في وقت
ماتحاسبينيش عليه
الماضي
من غيره
ماكنتش حابقى انا
كتبت كتير
قريتلك
وباشكرك من قلبي
رجّعتيلي القصيدة
كل المعنى اللي عندي
باين ف عينيّ نظرة
ماهوش محتاج كلام
ما هو الكلام خلص
الجملة زي اتنين
وليكي عندي جملة
ليكي انتي الوقت وليّ الصبر
وحكمتي ملاذ الصبر
ارتحت جوة نظرتك
ولو صدقتي
اكون ليكي
وباوعدك
ألاقيكي
في كل ميعاد
أسمع شوقك
وارد عليه
أسأل قلبك
وادق معاه
ماسك قلبي
كإني باقولله ماتدقش
استنى قلبها
ييجي يدق معاك
ما تسبقش الزمن
وإلا تعيش وحيد
ودقاتك مالهاش شبه
ودقاتها مالهاش شبيه
ليها الزمن
وليك الصبر
اصبر
تنول
اصبر ع الوحدة
تقبلها
اصبر
تقول كلام موزون
اصبر
يكون صبرك حنون
وتتعوّد
اصبر، والقوة ليك
بتلف عقارب الساعة
وانت بتلف وياها
ولو هتحب تعكسها هتتعاكس
فلا تستنى لكن اصبر
الصبر ليك
وليها الوقت
سلام يسري
٢٠ يولية ٢٠٢٣
برلين
هناك تعليق واحد:
❤️ بحبك يا سلام بحبك ❤️
إرسال تعليق