ليكي الجمال
صافي الخيال
حضن اخترتيه وبتدفيه
وتاخدي منه حنية
ليكي الوصال
أمل متقال
على مسمعك رايق
ومطلب ليكي أغنية
—
ليكي الأمان
من الأحزان
أوقات فرح
رسماها عينيكي ضحكاية
ليكي السلام
ونور حنّان
في الحر ندى
وف وقت البرد دفاية
—
ليكي الكلام
من غير كلام
سما صافية
ترقيكي شمس ضوّاية
ليكي الأحلام
خيال أفلام
ضحك وإلهام
وحدوتة وتِسلاية
—
ليكي النكت
ما بتنتهيش
في كل خطوة
ماتزهقيش
ليكي السكون
مايتقطعش
في كل لحظة
ماتقلقيش
—
ليكي الجنينة
مزروعة
بأصناف الورود
ألوان
وروايحهم نَفَس غيّة
أنا مْسلّم
ومِستسلم
وباتمنالك ...
حتى لو انتي
مش ليّ
سلام يسري
٢١ يولية ٢٠٢٣
ليست هناك تعليقات:
إرسال تعليق