شكراً على الجايزة
ألف شكر ع الهِديّة
تقدير مهمّ ليّ
كنا..إنتِ و أنا .. لبعضِنا
أجمل فيلم
و أجمل مسرحيّة
كنا..إنتِ و أنا .. لبعضِنا
زيّ فيلم يسجِّل الحُريّة
زيّ موج النيل في أسوان
و سحر مشاهِد طبيعية
كنا..إنتِ و أنا .. لبعضِنا
زيّ وجبة سُخنة و شهيّة
زيّ طبق الكشري
معاه زيادة تقليّة
زيّ بطاطس صوابع طازة مقليّة
زيّ فطار أيّام العيد و معاه العيديّة
كنا..إنتِ و أنا .. لبعضِنا
زيّ فنجان القهوة ويّا سيجارة
نهار رايق
قدام مراية متعايق
أول شيء في الصُبحيّة
كنا..إنتِ و أنا .. لبعضِنا
زيّ الأسرة المصريّة
تتجمّع من زمان
على صوت الستّ أغنيّة
زيّ شاي واجب بعد الغدا
في ساعة عصريّة
زيّ لمّة الصحاب بالليل
وضحك على نكت هزلية
كنا..إنتِ و أنا .. لبعضِنا
زيّ الراهب و الزُهد
زي العامل و الجهد
زي الطاولة و النرد
زي المولود و النّهد
زي العشاق و السهد
زي الصحاب و العهد
زي محاسب و الجَرْد
زي الغُربة و البُعد
زيّ معسّل طمباك ، و قهوة استراند
كنا..إنتِ و أنا .. لبعضِنا
الشوارع مرسومة لِنا
ودلوقتي
إنتِ شُغلِك الدعاية عن حاجات استهلاكيّة
و انا فنان بالقطعة تتحدّد ليّ اليوميّة
أنا باتمشّى في شوارع وسط البلد
اقضي الأوقات مع الأصحاب لِحدّ ساعة فجريّة
و انتِ بعربيتك سوِاقة ع الطُرُق السريعة
و لا غير الراديو تسليّة
و راس السنّة مقضّيها على الخليج
في الصمت و يّا صوت الموج و ريح
و انتِ في حفلة دوشَة و يلزملها تصريح
إنتِ في مدينتك مغرّق البيوت التلج صمت
و هنا الشمس كاشفة بقسوة طول الوقت
بتاخدي صُوَر لكلّ لحظة
تتكوّم ألبومات
و انا هنا في مرسمي
بالوّن اللحظات
كنا..إنتِ و أنا .. لبعضِنا
و خِلِص الفيلم
من تلات أجزاء ملوّنة
خِلِص التصوير
هناك و هِنا
بتشبه بعضها الكادرات
لكن بتنزل التترات
كل الأسامي مكتوبة
الصحاب و الأهل
كل الأماكن و القهاوي
صنوف الأكل
كل الشوارع .. الشبابيك
حتى الهدايا
كل الكلام اللي اتنطق
من البداية
كل التنهيد و الضحك
و الأصوات
كل الروايح
شكل عقارب الساعات
إسمك و إسمي
رسمك و رسمي
و شكراً ع الهدية
تقدير مهم ليّ
كنا..إنتِ و أنا .. لبعضِنا
أجمل فيلم
و أجمل مسرحية
هناك تعليق واحد:
wow
سمعتها قبل كده لما قلتها في الهناجر من كذا سنة
إرسال تعليق